ჩეჩენი ლტოლვილები სახალხო დამცველს დახმარებას სთხოვენ
თბილისი.25.02.05.მედია ნიუსი. საქართველოს სახალხო დამცველს ჩეჩნეთიდან ლტოლვილმა 80-მა ადამიანმა სტატუსის მიღების საქმეში დახმარება სთხოვა.
ლტოლვილები მიიჩნევენ, რომ ლტოლვილთა და განსახლების სამინისტრომ ყოველწლიური აღწერის შედეგად მათ უსამართლოდ შეუწყვიტა ლტოლვილის სტატუსი და შესაბამისად, სტატუსიდან გამომდინარე, შეღავათების გარეშე დარჩნენ.
ლტოლვილები საქართველოს მთავრობიდან 14-ლარიან შემწეობას და საერთაშორისო ორგანიზაციებიდან ჰუმანიტარულ დახმარებებს იღებენ. გარდა ამისა, პანკისში ჩასახლებული ლტოლვილი ჩეჩნებისათვის სპეციალური რუსულენოვანი სკოლაა გახსნილი.
ვითარების გასარკვევად 26 თებერვალს საქართველოს სახალხო დამცველი სოზარ სუბარი პანკისის ხეობაში გაემგზავრება. დაგეგმილია შეხვედრები ჩეჩნეთიდან ლტოლვილ მოსახლეობასთან. გარდა ამისა, სოზარ სუბარი მათ ზოგად პრობლემებსაც გაეცნობა.
სახალხო დამცველთან ერთად, პანკისში ლტოლვილთა და განსახლების სამინისტროს წარმომადგენლები და სამხარეო ადმინისტრაციის თანამშრომლებიც გაემგზავრებიან.