ფინეთში ტრეფიკინგის ბრალდებით დაკავებული ქართველების საქმე დაიხურა
თბილისი.27.09.05.მედიანიუსი. პარლამენტის თავმჯდომარე ნინო ბურჯანაძე აცხადებს, რომ ცოტა ხნის წინათ ფინეთში ტრეფიკინგის ბრალდებით რამდენიმე ქართველი ქალის დაკავების საქმე ფინეთის პრეზიდენტთან ტარია ჰალონენთან მისი შეხვედრის შემდეგ დახურულია.
“სამწუხაროა, რომ ეს ქალბატონები ამ დღეში კონკრეტული თანამდებობის პირებისა და იმ ფირმების გამო აღმოჩნდნენ, რომლებმაც საქმის კურსში ისინი ბოლომდე არ ჩააყენეს. ეს ინციდენტი ამოწურულია და ვიმედოვნებ, რომ ქალბატონებს სწორ ინფორმაციას მიაწვდიან. ისინი შეცდომაში შეიყვანეს, რადგან ფინეთში ისინი ადგილობრივი და ევროკავშირის კანონმდებლობის დარღვევით გაამგზავრეს”, _ აცხადებს ნინო ბურჯანაძე.
ფინეთის პრეზიდენტი ტარია ჰალონენი საქართველოს დღეს ეწვია. მან უკვე გამართა შეხვედრები პრეზიდენტ სააკაშვილთან და პარლამენტის თავმჯდომარესთან ნინო ბურჯანაძესთან.