ძალოვანი სტრუქტურების ყოფილმა წარმომადგენლებმა საპროტესტო აქცია გამართეს
თბილისი.25.10.05.მედიანიუსი. შრომის, ჯანმრთელობის და სოციალური დაცვის სამინისტროს შენობის წინ ძალოვანი სტრუქტურების ყოფილმა წარმომადგენლებმა საპროტესტო აქცია მოაწყვეს.
ყოფილი პოლიციელები ჯანდაცვის სამინისტროს მიერ შემუშავებულ საპენსიო ცვლილებების შესახებ კანონპროექტს აპროტესტებენ და აცხადებენ, რომ ცვლილებები მათი პენსიის შემცირებას ითვალისწინებს.
საპროტესტო აქციის მონაწილეები სამინისტროს თანამშრომლებს შენობაში არ უშვებდნენ და მინისტრის მოადგილესთან ვახტან მეგრელიშვილთან შეხვედრას ითხოვდნენ.
ჯანდაცვის მინისტრის მოადგილე აქციის მონაწილეებს შეხვდა თუმცა, ხმაურიანი შეხვედრის პირობებში დიალოგი არ შედგა.
როგორც `მედიანიუსს~ სოციალური დაზღვევის ერთიან სახელმწიფო ფონდში განუცხადეს, ჯანდაცვის სამინისტროს მიერ შემუშავებული კანონპროექტი, მხოლოდ და მხოლოდ, იმ ადამიანებისთვის ითვალისწინებს საპენსიო ცვლილებებს, რომლებიც საპენსიო ასაკს 2006 წლიდან მიაღწევენ.