მედია ტრეფიკინგის წინააღმდეგ ბრძოლას იწყებს

მედია ტრეფიკინგის წინააღმდეგ ბრძოლას იწყებს

ადამიანის უფლებათა საინფორმაციო და სადოკუმენტაციო ცენტრმა  2005 წლის 24 ოქტომბერს ტრეფიკინგთან დაკავშირებით ჟურნალისტებისთვის საინფორმაციო სემინარი ჩაატარა.

ამ კამპანიას ცენტრი ბერძნულ ორგანიზაციასთან „მშვიდობის, კვლევისა და მოქმედების ცენტრთან“ ერთად აწარმოებს. საზოგადოების ინფორმირების კამპანია პროექტის „შეწყდეს ტრეფიკინგი“ - ფარგლებში ხორციელდება. პროექტს ძირითადად საბერძნეთის საგარეო საქმეთა სამინისტრო აფინანსებს.

სემინარის,  სახელწოდებით „მედია ტრეფიკინგის წინააღმდეგ“, ფარგლებში მედიის წარმომადგენლებსა და საქართველოს სახელმწიფო უწყებების და საერთაშორისო ორგანიზაციების წევრებს შორის ინფორმაციის გაცვლა და კოორდინირებული მუშაობის პერსპექტივების დასახვა მოხდა. მომხსენებელთა შორის ეროვნული უშიშროების საბჭოს მრჩეველი და ტრეფიკინგთან ბრძოლის უწყებათაშორისი კომისიის წევრი, ბ-ნი ალექსანდრე ნალბანდოვი, მიგრაციის საერთაშორისო ორგანიზაციის წევრი მარკ ჰულსტი და გაზეთ „რეზონანსის“ ჟურნალისტი ეკა გულუა იყვნენ.

სემინარი „მედია ტრეფიკინგის წინააღმდეგ“ ორგანიზებული იყო ადამიანის უფლებათა საინფორმაციო და სადოკუმენტაციო ცენტრის მიერ, ფრიდრიხ ებერტის ფონდის თანადაფინანსებით..

როგორც ადამიანის უფლებათა საინფორმაციო და სადოკუმენტაციო ცენტრის აღმასრულებელმა დირექტორმა უჩა ნანუაშვილმა განაცხადა, ტრეფიკინგის პრობლემა საზოგადოებას ბოლომდე გაცნობიერებული არ აქვს. არადა, პრობლემა მეტად აქტუალურია.

არაოფიციალური მონაცემებით, საქართველოში ტრეფიკინგის 500-ზე მეტი შემთხვევაა აღრიცხული, თუმცა ეს მაჩვენებელი რეალურად გაცილებით დიდია.  ნანუაშვილის თქმით, ტრეფიკინგის ცნება ხშირად ჟურნალისტების მიერაც შეცდომით არის ხოლმე განმარტებული.

ამ საკითხზე საზოგადოების სხვადასხვა ფენის წარმომადგენელთათვის სემინარებს ცენტრი მუდმივად ატარებს. მიმდინარე თვეს, მსგავსი სახის ტრენინგი სტუდენტებს, სოციალურად დაუცველ ქალებსა და იძულებით გადაადგილებულ პირებსაც ჩაუტარდათ. საინფორმაციო სემინარების გამართვას სხვადასხვა რისკ-ჯგუფებისათვის ცენტრი უახლოეს ერთ თვეშიც აპირებს. უახლოეს ხანებშივე ცენტრი გახსნის სპეციალურ საიტს ქართულ და ინგლისურ ენებზე. ამ საიტზე თავმოყრილი იქნება ყველა ის ინფორმაცია, რაც ტრეფიკინგს შეეხება. ცენტრის მიერვე მზადდება საინფორმაციო გამოცემები ტრეფიკინგზე, რომლებიც საზოგადოების ფართო ფენებში გავრცელდება.