ზეწოლა მედიაზე კახეთის რეგიონში
ამა წლის 17 ნოემბერს გურჯაანის გამგეობის შენობის წინ ადგილობრივმა ჟურნალისტებმა საპროტესტო აქცია გამართეს. მათ გურჯაანის გამგებლის აკაკი სიხარულიძის სატელევიზიო გამოსვლა გააპროტესტეს.
16 ნოემბერს, გურჯაანის რაიონის გამგებელმა აკაკი სიხარულიძემ, ადგილობრივი ტელევიზიით გამოსვლისას, საჯაროდ დასდო ბრალი რეგიონის მედია საშუალებებს კორუმპირებულობაში, შეკვეთილი ინფორმაციის გავრცელებაში და სპეცსამსახურების შეგზავნით დაემუქრა.
ჟურნალისტთა საპროტესტო აქციას სიხარულიძის ბოდიში მოჰყვა და კორუფციაში უკვე არა მთლიანად მედია, არამედ კონკრეტული ჟურნალისტი _ გელა მთივლიშვილი დაადანაშაულა.
გარდა ამისა, სატელეიზიო გამოსვლაში სიხარულიძემ საჯაროდ განაცხადა, რომ არ ცნობს ინფორმაციის საჯაროობას და რომ გამგეობის სხდომებზე არ დაუშვებს მედიის დასწრებას: “ჩემი ნებაა, როცა მინდა მაშინ გავცე საჯარო ინფორმაცია, ასევე ჩემი კეთილი ნებაა, დავასწრებ თუ არა ჟურნალისტებს სხდომებზე”, _ განაცხადა სიხარულიძემ.