სექტემბრიდან პატიმრები სამოქალაქო საავადმყოფოში იმკურნალებენ

სექტემბრიდან პატიმრები სამოქალაქო საავადმყოფოში იმკურნალებენ

თბილისი.17.01.06.მედიანიუსი. საქართველოს იუსტიციის მინისტრმა გია ქავთარაძემ და შრომის, ჯანმრთელობისა და სოციალური დაცვის მინისტრმა ლადო ჭიპაშვილმა დღეს მსჯავრდებულთა და პატიმართა სამკურნალო დაწესებულებაში ხელი მოაწერეს ერთობლივ ბრძანებას, რომლის თანახმად, სასჯელაღსრულების სისტემის სამედიცინო პუნქტები ეტაპობრივად გადავა შრომის, ჯანმრთელობისა და სოციალური დაცვის სამინისტროს დაქვემდებარებაში.

ლადო ჭიპაშვილის თქმით, საპატიმროების სამედიცინო სამსახურების ერთი სამინისტროდან მეორეში გადაცემის პროცესი 2006 წლის 1 სექტემბრისათვის დასრულდება. ავადმყოფი პატიმრები იმკურნალებენ სამოქალაქო საავადმყოფოში, იმავე პირობებში, როგორშიც ჩვეულებრივი მოქალაქეები მკურნალობენ. იუსტიციის სამინისტროს სასჯელაღსრულების დეპარტამენტი მხოლოდ მათ დაცვას უზრუნველყოფს.

გარდამავალ პერიოდში შეიქმნება ექიმთა კომისია, რომელსაც ერთობლივად გააკონტროლებენ იუსტიციისა და შრომის, ჯანმრთელობისა და სოციალური დაცვის სამინისტროები. ექიმთა კომისიას თავმჯდომარე უხელმძღვანელებს და იგი მიიღებს პატიმართა ჯანმრთელობის დაცვასთან დაკავშირებულ ყველა გადაწყვეტილებას. კომისიაში 17 სპეციალობის 37 ექიმი შევა.