ეუთოს ბაქოს ოფისის ხელმძღვანელმა რობინ სივორდმა შეშფოთება გამოთქვა აზერბაიჯანული პოლიციის უმოქმედობის გამო, აზერბაიჯანის ოპოზიციური გაზეთების ჟურნალისტებზე განხორციელებული თავდასხმების გამოძიებასთან დაკავშირებით.
სივორდის განცხადებით, ეუთოს შეშფოთებას, განსაკუთრებით ის ფაქტი იწვევს, რომ დანაშაულებები დღისით, საზოგადოებრივ ადგილებში განხორციელდა.
დიპლომატის თქმით, იმისთვის, რომ გამართლდეს საზოგადოების ნდობა ხელისუფლების მიმართ, სამართალდამცველებმა ოპერატიულად უნდა გამოავლინონ ბოროტმოქმედები და ისინი სასამართლოს გადასცენ.
დაუდგენელმა პირებმა კვირას, საკუთარი საცხოვრებელი ბინის სადარბაზოს წინ ოპოზიციური გაზეთის „მილეთის“ („ერი“) მთავარი რედაქტორი ალი ორუჯევი სცემეს.
ინციდენტიდან მეორე დღეს, თავდასხმა განხორციელდა ოპოზიციურ გაზეთ „აზადლიგის“ („თავისუფლება“) ჟურნალისტზე, ნიჯათ დაგლარზე. ჟურნალისტს, ოთხი, ჯერჯერობით, დაუდგენელი პირი ხელკეტებით გაუსწორდა. დაზარალებულს შინაგანი ორგანოები აქვს დაზიანებული. ნიჯათ დაგლარი ცნობილია მაღალი თანამდებობის პირთა კორუფციული საქმიანობის მამხილებელი სტატიებით.
წყარო:Media.ge