დაუდგენელმა პირებმა გაზეთ „გალის“ რედაქტორს, ნუგზარ სალაყაიას სცემეს, ინციდენტი არაღიარებული აფხაზეთის რესპუბლიკის ტერიტორიაზე მოხდა.
აფხაზეთის ავტონომიური რესპუბლიკის მთავრობის წარმომადგენელმა თორნიკე კილანავამ განაცხადა, რომ ინციდენტი დაკავშირებულია გაზეთ „გალში“ გამოქვეყნებულ ერთ-ერთ სტატიასთან, რომელშიც სოხუმში დატყვევებული ქართველი სტუდენტები (სამი ქართველი სტუდენტი, რომლებიც აფხაზურმა მხარემ გაათავისუფლა-media.ge) აფხაზების მძევლებად არიან მოხსენიებულნი.
ამავე სტატიაში საუბარია იმის შესახებაც, რომ ორი ერის შერიგება აფხაზ და ქართველ სტუდენტებს შეუძლიათ და აფხაზები დღემდე ვერ მიმხვდარან, რომ საფრთხე მათ რუსებისგან და არა ქართველებისგან ემუქრებათ.
კილანავას განცხადებით, სასტიკად ნაცემი ნუგზარ სალაყაია სოხუმის ერთ-ერთი საავადმყოფოს რეანიმაციულ განყოფილებაში მოათავსეს.
„გალი“ უკვე ხუთი წელია აფხაზეთში გამოდის, თუმცა, დიდი შეფერხებებით - სულ 35-40 ნომერი გამოვიდა. გაზეთი ქართულ, რუსულ და მეგრულ ენებზე იბეჭდება.
წყარო: media.ge