7 ნოემბრის აქციის დროს სპეცდანიშნულების რაზმის წევრის განსაკუთრებული სისასტიკით ცემაში ეჭვმიტანილ ზვიად ხარგილიას ბრალი წაუყენეს. როგორც საინფორმაციო სააგენტო „პირველს“ შსს-ს საზოგადოებასთან ურთიერთობის დეპარტამენტის უფროსმა შოთა ხიზანიშვილმა განუცხადა, ხარგილიას წინააღმდეგ სისხლის სამართლის საქმე ოთხი, მათ შორის „ჯანმრთელობის განზრახ, მძიმე დაზიანების“ და „სამართალდამცველებისთვის წინააღმდეგობის გაწევის“ მუხლებით აღიძრა. წინასწარი ინფორმაციით, ხარგილიასთვის წაყენებული ოთხივე მუხლი ერთობლიობაში თავისუფლების 15 წლამდე აღკვეთას ითვალისწინებს.
გავრცელებული ინფორმაციით, ხარგილიას გარდა, სამართალდამცველებმა აქციის კიდევ რამდენიმე ათეული მონაწილე დააკავეს, რომლებსაც 30-დღიანი პატიმრობა აქვთ შეფარდებული. თუმცა ოფიციალური სტრუქტურები ამ ინფორმაციას არ ადასტურებენ და აცხადებენ, რომ აქციის მონაწილეთაგან მხოლოდ ორი პიროვნებაა დაკავებული.
წყარო: პირველი