პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე ელენე თევდორაძე უმაღლეს საკანონმდებლო ორგანოში სახალხო დამცველის მორიგი ანგარიშის დროულად განხილვას ითხოვს.
როგორც მან გუშინ გამართულ ბიუროს სხდომაზე განაცხადა, ამისათვის ეს საკითხი პარლამენტის მუშაობის დღის წესრიგში უნდა იყოს შეტანილი. თევდორაძის თქმით, სახალხო დამცველი ანგარიშებს წელიწადში ორჯერ ამზადებს. წლის მეორე ნახევრის ანგარიში პარლამენტში განსახილველად 31 ოქტომბერს შევიდა. მისი განხილვის ვადა დეკემბერში იწურება. თუმცა, ამ დოკუმენტის განხილვა ჯერჯერობით არ დაწყებულია.
ელენე თევდორაძის განმარტებით, ის, როგორც ამ საკითხის განხილვაში წამყვანი კომიტეტის თავმჯდომარე, ვალდებული იყო, პარლამენტისთვის ანგარიშის განხილვის ვადები შეეხსენებინა.
სახალხო დამცველის ანგარიშის განხილვის ვადები, წესისამებრ, პარლამენტის რეგლამენტით არის დადგენილი.
წყარო: მედიანიუსი