ახალგაზრდა იურისტები კვლევის - "მართლმსაჯულება საქართველოში" პრეზენტაციას გამართავენ
საქართველოს ახალგაზრდა იურისტთა ასოციაცია 11 დეკემბერს სასტუმრო "თბილისი მარიოტში" გამართავს კვლევის "მართლმსაჯულება საქართველოში" პრეზენტაციას.
როგორც ასოციაციაში აცხადებენ, მათი საქმიანობის ერთ-ერთი მიმართულებაა, მოამზადოს პერიოდული ანგარიშები საქართველოში ადამიანის უფლებების დაცვასთან დაკავშირებით. წარმოდგენილი კვლევა საქართველოში სამართლიანი სასამართლოს უფლების დაცვისა და გარანტირების შესახებ მოკლე ანგარიშს წარმოადგენს. კვლევაში განხილულია საკანონმდებლო სიახლეები მართლმსაჯულების საკითხებზე, მოსამართლეთა მიმართ დისციპლინური სამართალწარმოების მარეგულირებელი კანონმდებლობა და პრაქტიკა, მათ შორის გახმაურებული საქმეები. ასევე განხილულია სასამართლოში საზოგადოებრივი წესრიგის დაცვისა და სხდომების საჯაროობის საკითხები, მიმოხილულია აშშ-ს პრაქტიკა.
ამასთან, კვლევაში მოცემულია საინტერესო სტატისტიკა და მონაცემები ქართული სასამართლო სისტემისა და მოსამართლეების შესახებ.
პრეზენტაციას გახსნის საქართველოში ევროკომისიის წარმომადგენლობის ხელმძღვანელი პერ ეკლუნდი. შეხვედრას, მოქმედი და ყოფილი მოსამართლეები, სახელმწიფო სტრუქტურების წარმომადგენლები, საერთაშორისო და ადგილობრივი არასამთავრობო ორგანიზაციები და კვლევაზე მომუშავე ექსპერტები დაესწრებიან. გაიმართება აქტიური დისკუსია კვლევაში წარმოჩენილ პრობლემურ საკითხებზე.
კვლევა მომზადებულია ევროპის კავშირის მიერ დაფინანსებული პროექტის "სამართლებრივი სახელმწიფოს ხელშეწყობა საქართველოში" ფარგლებში.
წყარო: მედიანიუსი.
ახალი ამბები
პოპულარული
რატომ ვერ იბრუნებენ კონფლიქტით დაზარალებული ოსები საქართველოს მოქალაქეობას და ქონებას?
სპეციალურ პენიტენციურ სამსახურს წამების მსხვერპლის სასარგებლოდ 50 000 ლარის გადახდა დაეკისრა
'ალბათ, ნებისმიერი რეგიონული ჟურნალისტი გეტყვით, რომ გადარჩენისთვის გვიწევს ბრძოლა!'
