არაოფიციალური ინფორმაციით, აჭარის მთავრობის თავმჯდომარემ ლევან ვარშალომიძემ ბათუმის საკრებულოს თავმჯდომარე ბადრი ქაჯაია დაკავებული თანამდებობიდან გაათავისუფლა.
ბათუმის საკრებულოს ოპოზიციონერი წევრების თქმით, ვარშალომიძემ ხუთშაბათს, რიგგარეშე ფრაქციის სხდომაზე განაცხადა, რომ ბადრი ქაჯაიამ მაგისტრატურაში სწავლა უნდა გააგრძელოს. ბათუმის საკრებულოს პრესცენტრში აცხადებენ, რომ აღნიშნული ინფორმაცია სინამდვილეს არ შეესაბამება.
ოპოზიციონერთა განცხადებით, საკრებულოს თავმჯდომარის სავარძელს უახლოეს მომავალში, საკრებულოს წევრი, ტრავმატოლოგი და ჯანდაცვის სამინისტროს ყოფილი თანამშრომელი გია დიასამიძე დაიკავებს. დიასამიძე აჭარის მთავრობის თავმჯდომარის ლევან ვარშალომიძის გუნდის წევრია.
აღსანიშნავია, რომ საკრებულოს თავმჯდომარე არჩევითი კადრია და არა დანიშვნითი. თუმცა საკრებულოს ოპოზიციონერი პარტიის წარმომადგენლები აცხადებენ, რომ კადრს ვარშალომიძე დანიშნავს.
თავად ბადრი ქაჯაია კომენტარზე უარს აცხადებს. ქაჯაია ბათუმის საკრებულოს თავმჯდომარედ, ოთხი წლის ვადით საკრებულოს წევრებმა აირჩიეს. ის ამ თანამდებობაზე მხოლოდ ორი წელია რაც მუშაობს.