კახეთის რეგიონში მცხოვრები გლეხები პრეზიდენტის ნაჩუქარი ტრაქტორებით სარგებლობას ითხოვენ. როგორც გლეხებმა გვაცნობეს, იმ სოფლებში, სადაც მომსახურების ცენტრები ამ დრომდე არ ჩამოყალიბებულა, ტრაქტორებს მხოლოდ ამხანაგობის ხელმძღვანელი პირები მოიხმარენ.
გლეხების თქმით, ამხანაგობებში ძირითადად სოფლის ყოფილი გამგებლები და მათთან დაახლოებული პირები არიან გაერთიანებულები. "ტრაქტორები ან სულ დაკავებულია, ან არადა მიწის ნაკვეთის მოხვნის თუ სხვა სახის მომსახურების ღირებულება კერძო პირების მიერ დადგენილ ფასებს მკვეთრად აღემატება", - აცხადებენ ჭანდარში, ძირკოკში, აკურასა და სხვა სოფლებში მცხოვრები გლეხები. მათივე თქმით, ამ პრობლემების მოსაგვარებლად არაერთხელ მიმართეს ადგილობრივ ხელისუფლებას, მაგრამ უშედეგოდ.
იმ შემთხვევაში, თუ პრეზიდენტის ნაჩუქარი ტრაქტორებით სარგებლობის საშუალება არ მიეცათ, გლეხები ირწმუნებიან, რომ წელს იმაზე მეტი მიწის ნაკვეთები დარჩება დასამუშავებელი, ვიდრე გასულ წელს.
გელა მთივლიშვილი, კახეთი