ნინო დევიძე, კახეთი
შინაგან საქმეთა სამინისტროს ანტიკორუფციული სააგენტოს თანამშრომლებმა განსაკუთრებით დიდი ოდენობით ქრთამის აღების ბრალდებით, ყვარლის რაიონის მუნიციპალიტეტის გამგებლის მოადგილე ოთარ ადომლიშვილი დააკავეს.
შსს-ს ინფორმაციით, ოთარ ადომლიშვილმა თანამდებობრივი უფლება-მოვალეობების შესრულებისას და თანამდებობრივი ავტორიტეტის გამოყენებით, მოქალაქეს ყვარლის რაიონის სოფელ ენისელში მდებარე 711 931 კვ.მ მიწის ფართობის და მასზე განთავსებული შენობა-ნაგებობის აუქციონზე გატანის, მასში გამარჯვების და ქონებაზე ხელოვნურად ფასის დაკლების სანაცვლოდ, ქრთამის სახით 50 000 ლარი გამოართვა.
გამოძიება დიდი ოდენობით ქრთამის აღების ფაქტზე მიმდინარეობს, რომელიც საქართველოს სსკ-ის 338-ე მუხლის მე-3 ნაწილის ,,ე“ ქვეპუნქტით 11-დან 15 წლამდე თავისუფლების აღკვეთას ითვალისწინებს.