ქმედითი შრომის ინსპექციის მოთხოვნით კანცელარიასთან აქცია გაიმართა

ლანა გიორგიძე

 

28 ოქტომბერს მთავრობის ადმინისტრაციასთან შრომის პოლიტიკის დაუყონებლივ გადახედვისა და ეფექტური შრომის ინსპექციის შექმნის მოთხოვნით გამაფრთხილებელი აქცია გაიმართა. 

აქცია გამართეს: „ადამიანის უფლებების სწავლებისა და მონიტორინგის ცენტრის“ (EMC), საქართველოს პროფესიული კავშირების გაერთიანების, „აუდიტორია 115“-ის, „ქალთა მზერის“, „ახალგაზრდა მწვანეების“, „მწვანე მუშტის“, ირიბი მოქმედების კიბერ-თეატრის, Praxis/პრაქსისის, თბილისის სოლიდარობის ქსელის, თვითორგანიზების ქსელისა და „თეთრი ხმაურის მოძრაობის“ წარმომადგენლებმა. 

აქციაზე, EMC-ის წარმომადგენელმა, თამუნა ქებურიამ შეკრებილებს დასაქმების ადგილებზე დაღუპვის შესახებ მედიასაშუალებებით გავრცელებული ინფორმაცია გააცნო. 

„დღევანდელი აქცია შრომის უსართხოების პოლიტიკის გადახედვის საჭიროებას ეხება. აქციის ორგანიზატორები და მხარდამჭერები სახელმწიფოს მოვუწოდებთ, მყისიერად მოხდეს შრომის უსაფრთხოების პოლიტიკის გადახედვა, რაც გამოიხატება ქმედითი და ძლიერი  შრომის ინსპექციის სამსახურის შექმნაში. ბუნებრივია, შრომის ინსპექციის სამსახურს უნდა ჰქონდეს რეალური უფლებამოსილებები და მანდატი, რათა წინასწარი თანხმობის გარეშე შევიდეს სამუშაო ადგილებზე და დარღვევების აღმოჩენის შემთხვევაში მიიღოს შესაბამისი პრევენციული ზომები“, - აღნიშნა EMC-ის წარმომადგენელმა, ლინა ღვინიანიძემ humanrights.ge-სთან საუბრისას.

ლინა ღვინიანიძის თქმით, დღეს, ინსპექტირების მექანიზმს არ გააჩნია რეალური ბერკეტები, რათა დააჯარიმოს რომელიმე კომპანია, რომელიც დაარღვევს დასაქმებულის უფლებებს. 

„მხოლოდ წინასწარი თანხმობის შემთხვევაშია შესაძლებელი, შევიდეს საწარმოს ტერიტორიაზე შრომის ინსპექციის წარმომადგენელი. თუმცა, თუ არის შეტყობინება რომ ხდება შრომითი ექსპლუატაცია და ტრეფიკინგი, ამ შემთხვევაში შეტყობინების გარეშე, დაუყონებლივ შედის შრომის ინსპექცია სამუშაო ადგილზე. მიგვაჩნია, რომ ეს წესი უნდა გახდეს ზოგადი და შრომის ინსპექციას უნდა ჰქონდეს უპირობო დაშვება სამუშაო ადგილებზე“, - განაცხადა ღვინიანიძემ.

ქმედითი შრომის ინსპექციაა საქართველოს პროფესიული კავშირების გაერთიანების მოთხოვნაც. 

„ისე, როგორც საგადასახადო ინსპექცია არსებობს, რომელიც ამოწმებს იხდიან თუ არა გადასახადებს, ისევე როგორც გარემოს დაცვის ინსპექცია არსებობს, რათა შესაბამისი კანონმდებლობა გაატაროს, ასევე უნდა არსებობდეს ქმედითი შრომის ინსპექცია. შრომის ინსპექციამ მონიტორინგი უნდა გაუწიოს შრომის კანონმდებლობის გატარებას ყოველდღიურ ცხოვრებაში. როგორც კერძო, ისე სახელმწიფო საწარმოების უმრავლესობაში ირღვევა დასაქმებულების შრომითი უფლებები, კერძოდ, ადამიანებს შვებულებაში არ უშვებენ, არ უნაზღაურებენ ზეგანაკვეთურ მუშაობას, არც ავადმყოფობის გამო გაცდენილ საათებს უნაზღაურებენ. ეს და სხვა ბევრი პრობლემაა, რომელთაც შრომის უსაფრთხოებასთან ერთად უნდა ამოწმებდეს შრომის ინსპექცია“, - განაცხადა საქართველოს პროფკავშირების გაერთიანების თავმჯდომარის მოადგილემ, გოჩა ალექსანდრიამ humanrights.ge-სთან საუბარში.

გოჩა ალექსანდრიას თქმით, საქართველოსა და ევროკავშირს შორის ასოცირების შეთანხმების ფარგლებში  წერია, რომ საქართველო შექმნის შრომის ინსპექციას შრომის საერთაშორისო ორგანიზაციის 81-ე კონვენციის შესაბამისად.

სოლიდარობის ქსელის წარმომადგენელის, გიორგი კობახიძის თქმით, ის, რომ დასაქმებულთა სამუშაო ადგილზე დაშავებისა და გარდაცვალების რიცხვი გაიზარდა, ის, რომ მედიაში, თითქმის ყოველდღე შუქდება საწარმოო დაზიანებების შესახებ, ნიშნავს, რომ შრომის კოდექსი  და შრომის ინსპექცია უუნაროა.

აქციის ორგანიზატორებმა და მხარდამჭერებმა ფუნქციური შრომის ინსპექცია ჯანმრთელობისთვის, უსაფრთხოებისა და ღირსებისთვის მოითხოვეს და სასტვენების სტვენით მიმართეს საქართველოს მთავრობას, გატარდეს რეალური პოლიტიკა.