საქართველოს მთავარი პროკურატურა ბაკურ კიღურაძის მიმართ თბილისის სააპელაციო სასამართლოში გამამართლებელი განაჩენის დადგომას მოითხოვს. ბაკურ კიღურაძის ინტერესებს სასამართლოში ადამიანის უფლებათა ცენტრი დაიცავს.
პოლიტპატიმრად აღიარებულ ბაკურ კიღურაძის საქმეზე საქართველოს მთავარი პროკურატურის სამართალწარმოების პროცესში ჩადენილი დანაშაულის გამოძიების დეპარტამენტმა ხელახალი გამოძიება ჩაატარა. ჩატარებული ხელახალი გამოძიების შედეგად, პროკურატურა აცხადებს, რომ დარწმუნდა ბაკურ კიღურაძის უდანაშაულობაში და დადგენილებით მის მიმართ დამდგარი განაჩენის გადასინჯვის გადაწყვეტილება მიიღო.
დადგენილება, რომელიც ადასტურებს ბაკურ კიღურაძის უდანაშაულობას, პროკურატურამ, ახლადგამოვლენილ გარემოებათა გამო, განაჩენის გადასინჯვის მიზნით თბილისის სააპელაციო სასამართლოს წარუდგინა. წარდგენილი დადგენილებით პროკურატურა ბაკურ კიღურაძის მიმართ თბილისის სააპელაციო სასამართლოში გამამართლებელი განაჩენის დადგომას მოითხოვს.
ადამიანის უფლაბათა ცენტრი მიესალმება პროკურატურის გადაწყვეტილებას და იმედს გამოთქვამს, რომ სააპელაციო სასამართლო გაიზიარებს პროკურატურის დადგენილებას და გადასინჯავს ბაკურ კიღურაძის მიმართ დამდგარ განაჩენს.
თბილისის სააპელაციო სასამართლოს მიერ განაჩენის ხელახლა გადასინჯვის შედეგად ბაკურ კიღურაძეს მოეხსნება უკანონოდ დადებული გამამტყუნებელი მსჯავრი და მოხდება მისი სამართლებრივი რეაბილიტაცია.
ბიზნესმენი ბაკურ კიღურაძე 2010 წლის 13 ივლისს ჯაშუშობის ბრალდებით დააკავეს და სასამართლომ მას 9 წლით თავისუფლების აღკვეთა მიუსაჯა. 2013 წლის 13 იანვარს ბაკურ კიღურაძე პატიმრობიადან განთავისუფლდა პოლიტპატიმრის სტატუსით. მის მიმართ წარმოებულ საქმეს გამოძიების დაწყებიდან დღემდე გრიფი „საიდუმლო“ ადევს.
ადამიანის უფლებათა ცენტრი