Humanrights.ge
ადამიანის უფლებათა ცენტრის იურისტის სამართლებრივი დახმარების შედეგად, თბილისის საქალაქო სასამართლომ შეწყვიტა ადმინისტრაციული წარმოება მოძრაობა „რიონის ხეობის მცველების“ აქტივისტის, გელა გოგრიჭიანის და ჟურნალისტ რატი რატიანის მიმართ.
ადმინისტრაციული სამართალდარღვევის საქმეს განიხილავდა თბილისის საქალაქო სასამართლოს ადმინისტრაციულ საქმეთა კოლეგიის მოსამართლე დავით წერეთელი.
ადმინისტრაციული სამართალდარღვევის საქმე ეხებოდა თბილისში, გარემოს დაცვისა და სოფლის მეურნეობის სამინისტროსთან „რიონის ხეობის მცველების“ საპროტესტო აქციაზე დაკავებულ სამოქალაქო აქტივისტებს, რომლებიც აპროტესტებდნენ რუსეთში მცხოვრებ ბიზნესმენთან, დავით ხიდაშელთან დაკავშირებული კომპანიისთვის - შპს „ეიჩ ჯი კაპრა კაუკასიკასთვის“ რაჭაში 104 ჰექტარზე მეტი ტყის ფართობზე სამონადირეო მეურნეობის მოსაწყობად ლიცენზიის გაცემას.
18 ნოემბერს, საპროტესტო აქციის მიმდინარეობისას, „რიონის ხეობის მცველები“ იმ დროს დააკავეს, როდესაც ისინი კარვის გაშლას ცდილობდნენ. აქტივისტებთან ერთად დააკავეს „მაუწყებლის“ ჟურნალისტი, რატი რატიანი, რომელიც საპროტესტო აქციის მიმდინარეობის შესახებ ტელერეპორტაჟს ამზადებდა.
ადამიანის უფლებათა ცენტრმა რატი რატიანის უსაფუძვლოდ დაკავების ფაქტზე სპეციალურ საგამოძიებო სამსახურს მიმართა და მოითხოვა იმ პოლიციელების პასუხისგებაში მიცემა, რომლებმაც ჟურნალისტს საქმიანობაში ხელი შეუშალეს. სამსახურმა გამოძიება დაიწყო.