კონსტანტინე გამსახურდია ხელისუფლებისგან ცოტნე გამსახურდიას გათავისუფლებას მოითხოვს

 პარტია “თავისუფლების” ლიდერი კონსტანტინე გამსახურდია ხელისუფლებისგან ცოტნე გამსახურდიას გათავისუფლებას მოითხოვს.

კონსტანტინე გამსახურდიას განცხადებით, ხელისუფლება აგრძელებს ზვიად გამსახურდიას ოჯახის წევრების დევნას და ოპონენტთა და არასასურველ პირთა დაპატიმრების პრაქტიკას.
“ცოტნე გამსახურდიას დაპატიმრება, შესაძლოა, დასაწყისია იმ დიდი რეპრესიებისა, რომელთა განხორციელებასაც სააკაშვილი თავისი დანაშაულის დასაფარად აპირებს. მივმართავ საერთაშორისო საზოგადოებასა და ადამიანის უფლებათა დამცველ ორგანიზაციებს, მოახდინოს ზეწოლა საქართველოს ხელისუფლებაზე, მიხეილ სააკაშვილისგან კი, პირადად მოვითხოვ ცოტნე გამსახურდია გათავისუფლებას”, - აღნიშნავს კონსტანტინე გამსახურდია შვეიცარიიდან გავრცელებულ განცხადებაში..

საქართველოს პირველი პრეზიდენტის ვაჟი ცოტნე გამსახურდია შსს-ს კონტრდაზვერვის დეპარტამენტის თანამშრომლებმა 3 სექტემბერს თბილისის საერთაშორისო აეროპორტში დააკავეს. ის მოდულის შენობაში უკვე დაკითხეს, რომლის დროსაც, გამსახურდიას ადვოკატების ინფორმაციით, მან დუმილის უფლება გამოიყენა.

გავრცელებული ინფორმაციით, ცოტნე გამსახურდია ეჭვმიტანილია სამშობლოს ღალატში, კონსტიტუციური წყობილების დამხობის მცდელობაში და ჯაშუშობაში.

წყარო:მედიანიუსი