წნორის მოსახლეობა "კახეთის ენერგოდისტრიბუციას" გადასახადების გაორმაგებაში ადანაშაულებს

სიღნაღის რაიონის დაბა წნორის მოსახლეობა ს/ს "კახეთის ენერგოდისტრიბუციას" მოხმარებული ელექტროენერგიის ღირებულების გაორმაგებაში ადანაშაულებს. აბონენტების განცხადებით, ენერგოკომპანიის მიერ უკანონოდ მოთხოვნილი თანხების გადაუხდელობის შემთხვევაში "კახეთის ენერგოდისტრიბუციის" წნორის სერვის – ცენტრი მოსახლეობას ელექტროენერგიის მიწოდებას უწყვეტს.

ადგილობრივების თქმით, "კახეთის ენერგოდისტრიბუცია" მომხდარს მოძველებული მრიცხველების არსებობით ხსნის. წნორელებმა დახმარებისათვის ადგილობრივ ხელისუფლებასაც არაერთხელ მიმართეს, მაგრამ უშედეგოდ.

"კახეთის ენერგოდისტრიბუციის" წნორის სერვის – ცენტრის მენეჯერი პაატა მოსიაშვილი ბრალდებებს უარყოფს, თუმცა ადასტურებს, რომ მოხმარებული ელექტროენერგიის აღრიცხვასთან დაკავშირებით გარკვეული პრობლემები ნამდვილად არსებობს. "ეს საკითხი აგვისტომდე ვერ მოგვარდება", - განაცხადა მოსიაშვილმა.

გელა მთივლიშვილი,კახეთი