ინტერნეტ-ტელევიზია „Gevision“ ჰაკერების შეტევის მსხვერპლი გახდა. როგორც „პირველს“ ტელევიზიიდან აცნობეს, პირველი ქართული ინტერნეტ-მაუწყებელი უკვე სამი დღეა შეფერხებით მუშაობს. ამის მიზეზი კი ჰაკერების მიერ საიტის ყოველდღიური დავირუსებაა. ტელევიზიის ხელმძღვანელები ეჭვობენ, რომ არსებული პრობლემები მაუწყებელზე „დარდუბალა 2-ის“ ძველი სერიების განთავსებას უკავშირდება, რომელშიც საქართველოს პრეზიდენტი მიხეილ სააკაშვილია გაშარჟებული. „იმედს ვიტოვებთ, რომ ინტერნეტმაუწყებელზე შეტევები შეწყდება, წინააღმდეგ შემთხვევაში ტელევიზიის ადმინისტრაცია დაცვის სხვა მექანიზმზე გადავა“, - განაცხადა ინტერნეტ ტელევიზიის ხელმძღვანელმა რუსუდან ჭაბუკიანმა.
წყარო: საინფორმაციო სააგენტო „პირველი“