საქართველოში საფრანგეთის საელჩომ პანკისის ხეობასა და საქართველოს სამხრეთ - აღმოსავლეთით უდაბნოს ტერიტორიაზე უცხოელი მოქალაქეების გადაადგილებაზე შეზღუდვები მოხსნა. ამის შესახებ კახეთის საინფორმაციო ცენტრს საფრანგეთის საელჩოს პრესატაშემ განუცხადა. მისი თქმით, შესაბამისი განცხადება დამუშავების პროცესშია და საელჩოს ოფიციალურ ვებ-გვერდზე უახლოეს დღეებში გამოქვეყნდება.
საფრანგეთის საელჩომ საქართველოს ჩრდილოეთ და აღმოსავლეთ საზღვარზე არსებული კონფლიქტური სიტუციებიდან გამომდინარე, უცხოელ მოქალაქეებს რამდენიმე რაიონში გამგზავრება რუსეთ - საქართველოს ომის დროს აუკრძალა. ეს ადგილებია: ჩრდილოეთ კავკასიის მოსაზღვრე ზონები (ჩეჩნეთი, დაღესტანი, ჩრ.ოსეთი) და პანკისის ხეობა, სადაც ამჟამად 4 000 ჩეჩენი ლტოლვილი იმყოფება; აფხაზეთისა და სამხრეთ ოსეთის სეპარატისტული რეგიონები; თბილისიდან ჩრდილოეთით 60 კმ-ის დაშორებით მდებარე გორის რაიონი, სამხრეთ ოსეთის მახლობლად, საკუთარ ავტომობილებსა და სახელმწიფო ტაქსზე თავდასხმების, განუკითხაობისა და ყველანაირი საქონლით უკანონო ვაჭრობის გამო. გადაადგილება არ იყო რეკომენდირებული ასევე უდაბნოში (საქართველოს სამხრეთ-აღმოსავლეთი მხარე, აზერბაიჯანის საზღვართან).
კახეთის საინფორმაციო ცენტრი