საშიში და იშვიათი ვირუსით 10 მაისს ოზურგეთის მუნიციპალიტეტის სოფელ მერიაში მცხოვრები 6 წლის ს.გ. გარდაიცვალა. როგორც „ადამიანის უფლებათა ცენტრს“ ოზურგეთის მუნიციპალიტეტის საზოგადოებრივი ჯანდაცვის ხელმძღვანელმა არჩილ მჟავიამ განუცხადა, გარდაცვლილს მაღალი ტემპერატურა ჰქონდა. უბნის ექიმმა კი მას დიაგნოზი - ფილტვების ორმხრივი პნევმონია დაუსვა.
მისივე თქმით, აღნიშნულ შემთხვევასთან დაკავშირებით, გრიპი გამოირიცხა. ჩატარდა გარდაცვლილის კერაში ეპიდემიური კვლევა, აღებული იქნა ლაბორატორიული კვლევისთვის ანალიზები. წინასწარი მონაცემებით, აღმოჩნდა ე. წ. ჰემორაგიული ცხელება, ინფექციური დაავადება, რომლის ძირითადი გადამტანები მღრღნელები და ტკიპებია.
ეს ინფექცია საქართველოში იშვიათ დაავადებათა რიცხვში შედის. გურიაში ასეთი შემთხვევა წლების მანძილზე არ დაფიქსირებულა. მჟავია აღნიშნავს, რომ წინასწარი მონაცემებით, გარდაცვლილის სამ ახლო მეზობელს აღმოაჩნდა ჰემორაგიული ცხელების გამომწვევი ანტისხეულები და ამჯამად მიმდინარეობს კვლევა.
ს.გ.-ს ცხედარი პოლიციის თანამშრომლებმა ქუთაისის საექსპერტო ბიუროში გადაასვენეს, სადაც წინასწარმა პათანატომიურმა გამოკვლევებმა სისხლჩაქცევები ფილტვებსა და თირკმელში აჩვენა.
შორენა ღლონტი, გურია
ახალი ამბები
პოპულარული
რატომ ვერ იბრუნებენ კონფლიქტით დაზარალებული ოსები საქართველოს მოქალაქეობას და ქონებას?
სპეციალურ პენიტენციურ სამსახურს წამების მსხვერპლის სასარგებლოდ 50 000 ლარის გადახდა დაეკისრა
'ალბათ, ნებისმიერი რეგიონული ჟურნალისტი გეტყვით, რომ გადარჩენისთვის გვიწევს ბრძოლა!'
