ყვარლის რაიონის სოფელ გავაზის საჯარო სკოლაში სასწავლო პროცესი არ დაიწყო. კახეთის საინფორმაციო ცენტრის ინფორმაციით, მუნიციპალური განვითარების ფონდმა, რომლის დაფინანსებითაც სკოლის შენობის რეაბილიტაცია მიმდინარეობს, კონტრაქტორ სამშენებლო კომპანიას პროექტის დასრულების დრო ორჯერ გადაუვადა.
გავაზის საჯარო სკოლის დირექტორის პაატა ბერიაშვილის განცხადებით, მშენებლები ხშირად იცვლებოდნენ, რის გამოც სამუშაოები შეფერხდა. მისივე თქმით, სასწავლო პროცესი სავარაუდოდ 1 ოქტომბრიდან დაიწყება.
„მუნიციპალური განვითარების ფონდის გასაკეთებელი რაც იყო, ყველაფერი გაკეთდა. დანარჩენი სამუშაოები ყვარლის მუნიციპალიტეტის გამგეობას უნდა შეესრულებინა, მაგრამ ამ დრომდე არ შესრულდა“, - განუცხადა კახეთის საინფორმაციო ცენტრს ფონდის დირექტორმა ლევან ჭიჭინაძემ.
ყვარლის მუნიციპალიტეტის გამგეობაში ამ საკითხზე კომენტარს არ აკეთებენ.
კახეთის საინფორმაციო ცენტრი