თბილისში, ჩხეიძის ქ. #8-ში, დევნილების გამოსახლების დროს პოლიციის თანამშრომელმა, რომელიც ოპერაციას ხელმძღვანელობს, კოდორიდან დევნილი, 65 წლის იური სვანიძე სცემა. ამის შესახებ „ინტერპრესნიუსს“ „დევნილთა სამოქალაქო მოძრაობის“ წევრებმა აცნობეს. ისინი პროცესს დილიდან აკვირდებიან.
მათი განცხადებით, თავად შეესწრნენ ინციდენტს, რომელიც მოხდა ჩხეიძის #8-ში.
სვანიძე შენობაში შესვლას ცდილობდა, წარმოუდგინა საბუთი, რომლის მიხედვითაც აღნიშნულ ობიექტზე ცხოვრობდა, პოლიციელები კი მაინც არ უშვებდნენ, რასაც ინციდენტი მოჰყვა.
გამოსახლება აღნიშნულ ობიექტზე 24 იანვარს დილიდან დაიწყო და 80-მდე ოჯახი გამოასახლეს.
დევნილის ცემის თაობაზე გავრცელებულ ინფორმაციას უარყოფს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო.
როგორც სამინისტროს მიერ გავრცელებულ განცხადებაშია აღნიშნული, ჩხეიძის #8-ში მდებარე შენობიდან დევნილების გამოსახლებისას პოლიციის მიერ ერთი დევნილის ცემის შესახებ გავრცელებული ინფორმაცია სიმართლეს არ შეესაბამება.
„ეს დეზინფორმაციაა. დევნილთა განსახლების პროცესი მშვიდ ვითარებაში მიმდინარეობს და არანაირი ინციდენტი არ მომხდარა. „სამოქალაქო მოძრაობის“ წარმომადგენლები ცრუ ინფორმაციას შეგნებულად ავრცელებენ და ამით სიტუაციას ხელოვნურად ძაბავენ“, - აღნიშნულია განცხადებაში.
ინტერპრესნიუსი