პრეზიდენტი მიხეილ სააკაშვილი აღიარებს, რომ საქართველოში მედიკამენტებზე ფასები დაუშვებლად მაღალია.
სატელევიზო პროექტში „ხალხის შეკითხვებს პასუხობს პრეზიდენტი“ მიხეილ სააკაშვილმა განაცხადა, რომ საქართველოში მედიკამენტებზე ფასები დღესაც დაუშვებლად მაღალია და რეგიონში ყველაზე ძვირია, რაც უნდა გამოსწორდეს. მისივე თქმით, ადრეც, საქართველოში წამლები დიდხანს იყო გაძვირებული, შარშან კი ხელისუფლებამ ფასები შეაკავა.
პრეზიდენტის განცხადებით, სიტუაციას ადრე მონოპოლისტები მართავდნენ, ახლა კი ცალკე სააფთიაქო ქსელი შეიქმნა და ერთი და იგივეს ხელში აღარ არის აფთიაქები.
მიხეილ სააკაშვილმა მედიკამენტების ფასებზე საუბრისას აფთიაქებში ვიდეოსამეთვალყურეო კამერების დაყენებაზეც ისაუბრა და განაცხადა, რომ ამის გამო ზოგმა „წუწუნი“ ატეხა, წამლები გაძვირდებაო. მაგრამ, პრეზიდენტის მტკიცებით, ეს ფასებს არ გააძვირებს.
ამასთან, სატელევიზიო პროექტში „ხალხის შეკითხვებს პასუხობს პრეზიდენტი“ მიხეილ სააკაშვილმა განაცხადა, რომ დაზღვევა საქართველოში საკმაოდ პრობლემატურია, რადგან არ არის ისეთი, როგორიც უნდა იყოს. კერძოდ, არ ფარავს ქრონიკულ დაავადებებს, არ ფარავს წინასწარ შემოწმებას და ა.შ.
პრეზიდენტის განცხადებით, სადაზღვევო კომპანიები უნდა გაძლიერდნენ, უნდა გაიაფდეს მომსახურება და გაიზარდოს იმ დაავადებათა ჩამონათვალი, რომლებსაც სადაზღვევო კომპანიები დააფინანსებენ.
ამ მიზნების მიღწევას პრეზიდენტი 2-3 წელიწადში ვარაუდობს. თუმცა, მიხეილ სააკაშვილი იმასაც ამბობს, რომ სადაზღვევო ფირმების მოგების მარჟა დაუშვებლად მაღალია, რასაც სერიოზული რეგულაცია სჭირდება. პრეზიდენტს რეგულაციის მექანიზმები არ დაუკონკრეტებია.
ინტერპრესნიუსი
ახალი ამბები
პოპულარული
რატომ ვერ იბრუნებენ კონფლიქტით დაზარალებული ოსები საქართველოს მოქალაქეობას და ქონებას?
სპეციალურ პენიტენციურ სამსახურს წამების მსხვერპლის სასარგებლოდ 50 000 ლარის გადახდა დაეკისრა
'ალბათ, ნებისმიერი რეგიონული ჟურნალისტი გეტყვით, რომ გადარჩენისთვის გვიწევს ბრძოლა!'
