უწყებათაშორისი კომისია თავისუფალი და სამართლიანი არჩევნებისთვის საჯარო სამსახურებს რეკომენდაციას აძლევს ამ ეტაპზე დაგეგმილი ან შესაძლო ოპტიმიზაციის პროცესი შეაჩერონ და მხოლოდ დისციპლინარული ან სხვა სახის დარღვევის შემთხვევებში მიიღონ შესაბამისი გადაწყვეტილებები.
„კომისია საარჩევნო პროცესში ჩართულ სამოქალაქო სექტორის რიგ წარმომადგენლებთან შეხვედრებს მართავს. აღნიშნული შეხვედრების დროს სამოქალაქო სექტორის მხრიდან, მათ მიერ ჩატარებული მონიტორინგის საფუძველზე, სხვა საკითხებთან ერთად გამოიკვეთა საჯარო სექტორიდან თანამშრომლების გათავისუფლების პრობლემა, რაც აღნიშნულ ორგანიზაციათა აზრით, რიგ შემთხვევებში, სავარაუდოდ, პოლიტიკური მოტივაციის ნიშნებს შეიცავს.
აღნიშნულთან დაკავშირებით უწყებათაშორისი კომისიის პოზიცია არის მკაფიო: დაუშვებელია და კანონსაწინააღმდეგოა საჯარო მოხელეების სამსახურიდან გათავისუფლება მათი ან მათი ოჯახის წევრების პოლიტიკური პოზიციის გამო. შემთხვევა, სადაც მსგავსი ნიშნები იკვეთება, შესწავლის საგანი უნდა გახდეს.
ამასთანავე, აღსანიშნავია ისიც, რომ სხვადასხვა ადმინისტრაციულ უწყებებში ოპტიმიზაციის, შემცირებების ლეგიტიმური პროცესი შეიძლება მიმდინარეობდეს და ხშირად რთული იყოს უტყუარი ფაქტის დადგენა ამა თუ იმ პირის გათავისუფლების რეალური მოტივის შესახებ.
აღნიშნულის გათვალისწინებით და 2012 წლის საპარლამენტო არჩევნების თავისუფალ გარემოში ჩატარების უზრუნველყოფის მიზნით, რათა თავიდან იქნეს აცილებული ადმინისტრაციული ორგანოების და მათდამი დაქვემდებარებული უწყებების, ასევე საჯარო სკოლების დირექტორების მხრიდან თანამშრომელთა პოლიტიკური მოტივით გათავისუფლების საფუძვლიანი თუ უსაფუძვლო ბრალდებები, უწყებათაშორისი კომისია რეკომენდაციას აძლევს ადმინისტრაციულ ორგანოებს და მათთვის დაქვემდებარებული უწყებების ხელმძღვანელობას, ასევე საჯარო სკოლების ადმინისტრაციებს, საარჩევნო პროცესის გათვალისწინებით, ამ ეტაპზე დაგეგმილი ან შესაძლო ოტპიმიზაციის პროცესი შეაჩერონ და მხოლოდ დისციპლინარული ან სხვა სახის დარღვევის შემთხვევებში მიიღონ შესაბამისი გადაწყვეტილებები“, - ნათქვამია კომისიის მიერ გავრცელებულ განცხადებაში.
მცხეთა-მთიანეთის საინფორმაციო ცენტრი