ადამიანის უფლებათა ცენტრის განცხადება თბილისის ცენტრში მომხდარი არეულობისა და ძალადობის ფაქტების თაობაზე

სამართალდამცველებმა ფაქტობრივად ვერაფერი იღონეს იმ გაავებული მოქალაქეების გასანეიტრალებლად, რომლებიც არა მარტო ლგბტ აქტივისტებს და მათ მხარდამჭერებს აყენებდნენ ფიზიკურ და სიტყვიერ შეურაცხყოფას, არამედ - ჟურნალისტებს, პოლიციელებს,  სახალხო დამცველს, არასამთავრობო ორგანიზაციებისა და საზოგადოების სხვა წარმომადგენლებსაც, რომლებიც არც ერთ მხარეს არ წარმოადგენდნენ და შემთხვევის ადგილას სამსახურებრივ მოვალეობას ასრულებდნენ. 

აგრესიულმა ადამიანებმა დაარბიეს ჰომოფობიის საერთაშორისო დღისადმი მიძღვნილი აქცია და დააზიანეს საზოგადოებრივი მუნიციპალური ტრანსპორტი, სადაც აქციის მონაწილეები ეგულებოდათ. მათ მიერ ნასროლი ქვებით და სხვადასხვა საგნებით დაშავდნენ ჟურნალისტები და პოლიციელები.

ადამიანის უფლებათა ცენტრი მოითხოვს, სამართალდამცველმა უწყებებმა გამოავლინონ და პასუხისგებაში მისცენ მოქალაქეები, რომლებიც უშუალოდ მონაწილეობდნენ ძალადობაში და არღვევდნენ საზოგადოებრივ წესრიგს. 

ამავე დროს, პასუხი უნდა მოეთხოვოთ შინაგან საქმეთა სამინისტროს იმ მაღალჩინოსნებს, რომლებსაც უნდა დაეცვათ აქციის მონაწილეთა უსაფრთხოება და საზოგადოებრივი წესრიგი, მაგრამ ეს ამოცანა ვერ შეასრულეს.

17.05.13, ადამიანის უფლებათა ცენტრი