6 დეკემბერს, 15:00 საათზე, თბილისის ადამიანის უფლებათა სახლის საკონფერენციო დარბაზში კამპანია „იცურე მშვიდად“ წარმოადგენს სამართლის დოქტორის, მაკა ნუცუბიძის კვლევას - „წყალში დახრჩობით გამოწვეული სიკვდილიანობის პრევენცია“.
პრეზენტაციაზე ნაჩვენები იქნება ადამიანის უფლებათა ცენტრის ვიდეოპორტალის, hridc.tv-სა და მედიის ინსტიტუტის მიერ გადაღებული ფილმი - „კამპანია იცურე მშვიდად“, რომელშიც ასახულია კამპანიის ისტორია და მიზნები.
შეხვედრაში მონაწილეობას მიიღებენ აღმოსავლეთ პარტნიორობის სამოქალაქო საზოგადოების ფორუმის ეროვნული პლატფორმის წევრი ორგანიზაციები, რომლებიც კიდევ ერთხელ მიმართავენ ხელისუფლებას, დროულად შეიმუშაოს საკანონმდებლო ჩარჩო და პოლიტიკა წყლის ობიექტებთან დაკავშირებული უბედური შემთხვევების თავიდან აცილებისთვის. მიუხედავად იმისა, რომ პლატფორმის პირველი მიმართვიდან ერთ წელზე მეტი გავიდა, საქართველოს ხელისუფლებას არ მიუღია ეფექტიანი ზომები წყლის ობიექტებზე ტრაგიკული შემთხვევების პრევენციისათვის.
პრეზენტაციაზე მოწვეული არიან თბილისის მუნიციპალიტეტის და საგანგებო სიტუაციების მართვის სამსახურის წარმომადგენლები.
კამპანია „იცურე მშვიდად“ 2018 წ. 16 ივლისს დაიწყო ანა დოლიძის, ადამიანის უფლებათა ცენტრის, CENN-ის და პროგრესის ცენტრის ინიციატივით. კამპანიის მიზანია ხელისუფლების პასუხისმგებლობის გაზრდა და საზოგადოების ცნობიერების ამაღლება.
კამპანიას მხარს უჭერს ღია საზოგადოების ფონდი, რომლის დახმარებითაც შესაძლებელია სხვადასხვა აქციების, დისკუსიების მოწყობა და ადვოკატირება როგორც თბილისში, ისე საქართველოს სხვადასხვა რეგიონში.