მედიის ინსტიტუტი ეხმიანება საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოს ორი წევრის ინიციატივას, ტელევიზიის დირექტორის, ნათია კაპანაძის იმპიჩმენტის შესახებ.
აჭარის ტელევიზია და რადიო, ნათია კაპანაძის დირექტორობის პერიოდში, არაერთმა ადგილობრივმა თუ საერთაშორისო ორგანიზაციამ შეაფასა როგორც თავისუფალი, მიუკერძოებელი და მზარდი ინსტიტუტი.
„საერაშორისო გამჭვირვალობა - საქართველოს“ კვლევის თანახმად, ნათია კაპანაძის სახელთან ასოცირდება მაუწყებელში სხვადასხვა რეფორმის ინიცირება, კერძოდ: შემუშავდა ორგანიზაციის განვითარებისთვის საჭირო მთელი რიგი დოკუმენტაცია, განახლდა ძველი და დაიწყო ახალი გადაცემები, უფრო გამჭვირვალე გახდა თანამშრომელთა დასაქმების პროცესი. ორგანიზაცია არის გახსნილი მოქალაქეებისა და დაინტერესებული პირებისთვის, თუმცა აჭარის ტელევიზია და რადიო კვლავ არაერთი გამოწვევის წინაშე დგას.
მედიის ინსტიტუტი გამოხატავს შეშფოთებას, რომ პოლიტიკური ძალები, სავარაუდოდ, ცდილობენ, გავლენა მოიპოვონ საზოგადოებრივი მაუწყებლის აჭარის ტელევიზიასა და რადიოზე, რაც ყოვლად მიუღებელია და საფრთხეს უქმნის მედიის თავისუფლებასა და ქვეყნის იმიჯს საერთაშორისო ასპარეზზე.
მედიის ინსტიტუტი მოუწოდებს მრჩეველთა საბჭოს, არ გადადგას დაუფიქრებელი და საზიანო ნაბიჯი და კითხვის ქვეშ არ დააყენოს მედიის თავისუფლების საკითხი ქვეყანაში.
მედიის ინსტიტუტი