პორტალი ადამიანის უფლებების შესახებ

აფხაზურმა პოლიციამ მოსახლეობის დაშინება და გაფრთხილება არჩევნებამდე დაახლოებით ერთი კვირით ადრე დაიწყო. პარალელურად ენგურის ხიდის მიმდებარე ტერიტორია გაამაგრა და დამატებითი ძალები შეიყვანა. ამომრჩევლები ზუგდიდში რომ არ გადასულიყვნენ, 5 ოქტომბერს ენგურის მონაკვეთს 4 სამხედრო ვერტმფრენიც აკონტროლებდა. ენგურის ხიდი ერთადერთი საშუალებაა, რომელიც გალს ზუგდიდთან და დანარჩენ საქართველოსთან აკავშირებს.   

გალის რაიონის გამგებლის მოადგილე გია ლომაის ინფორმაციით, გალის 24 სოფლიდან ზუგდიდში გადასვლა მხოლოდ 3-4 სოფლის მოსახლეობამ მოახერხა.
"აფხაზური მხარე ცდილობს, ცენტრალურ ხიდზე არავინ გამოატაროს. ვინც გადმოსვლას დააპირებს, ყველას დაკითხვას უწყობენ და დეტალურად იკვლევენ ვინ სად და რატომ მიდის. ვისაც აფხაზური უშიშროების მიერ გაცემული სპეციალური საშვი აქვს, მას უპრობლემოდ ატარებენ. აქედან გამომდინარე, ძალიან მცირე ნაწილი ახერხებს არჩევნებში მონაწილეობას. სოფელ ოტობაიადან, ნაბაკევიდან და ბარღებიდან მოსახლეობის მცირე ნაწილმა მოახერხა ზუგდიდში გადმოსვლა",-აცხადებს ლომაია.
  
აფხაზეთის ლეგიტიმური მთავრობის უზენაესი საბჭოს თავმჯდომარის თემურ მჟავიას ინფორმაციით კი ენგურის ხიდთან ინციდენტიც მოხდა. "დეფაქტო აფხაზეთის ადმინისტრაციამ გალის რაიონში ზომები რამდენიმე დღეა გაამკაცრა. მათ წინასაარჩევნოდ ქართული მოსახლეობის დასაშინებლად კამპანიაც კი ჩაატარეს. მოსახლეობას აფრთხილებდნენ, რომ თუ არჩევნებში მონაწილეობას გაბედავდნენ, იძულებულები გახდებოდნენ, მათ მიმართ მკაცრი სანქციები გამოეყენებინათ. სოფელ ოტობაიაში ფიზიკური დაპირისპირებაც მოხდა. ამ სოფლის მოსახლეობა ხიდზე აპირებდა გადასვლას, აფხაზურმა მილიციამ კი ფიზიკური წინააღმდეგობა გაუწია," - ამბობს მჟავია.

როგორც თავად გალის მოსახლეობამ გვითხრა, აფხაზური მილიციის მუქარამ გაჭრა და  ისე შეშინდნენ, ზუგდიდში გადასვლა ვერ გაბედეს. "გალის აფხაზურმა ადმინისტრაციამ თითქმის ყველა სოფელი და ოჯახი შემოიარა. თავდაპირველად სიტყვიერი გაფრთხილება მოგვცეს. გვითხრეს, რომ თუ მათ სიტყვებს არ გავითვალისწინებდით, იძულებულები გახდებოდნენ, ჩვენს წინააღმდეგ ძალა გამოეყენებინათ. აგვიხსნეს, რომ ჩვენ ვართ სხვა სახელმწიფოს მოქალაქეები და მეზობელი სახელმწიფოს არჩევნებში მონაწილეობის უფლება არ გვაქვს, რადგან ეს აფხაზურ კონსტიტუციას ეწინააღმდეგებაო. აქედან გამომდინარე, გაგვაფრთხილეს, რომ თუ კონსტიტუციას დავარღვევდით, სს კანონმდებლობით დავისჯებოდით. მათი სისასტიკე ჩვენთვის საკმაოდ კარგად არის ცნობილი და ამიტომ შეგვეშინდა. ჩემი ინფორმაციით, ყოველი 20 ამომრჩევლიდან მხოლოდ ერთმა თუ გაბედა არჩევნებში მონაწილეობის სურვილის გამოხატვა. ვინც ენგურის ხიდზე გადავიდა, ძირითადად ქალები იყვნენ. მამაკაცები არ გავუშვით, რადგან დაპირისპირებას მოვერიდეთ,"  - გვითხრა გალში მცხოვრებმა ქართველმა ქეთევან გ-მ. მისივე თხოვნით, გვარს არ ვაქვეყნებთ, რადგან შემდგომი დაპირისპირების ეშინია.

კიდევ ერთი გალელი რესპონდენტი ქალბატონი ლამზირა დ. ერთ-ერთია, ვინც ენგურის ხიდზე მომხდარი დაპირისპირების თვითმხილველი გახდა. მისი თქმით,
ნაცემია ახალგაზრდა ბიჭი, რომელიც აფხაზურმა მილიციამ ზუგდიდში არ გადაუშვა: "ჩემი უბნიდან რამდენიმე ქალი შევიკრიბეთ და არჩევნებში მონაწილეობის მისაღებად "საზღვარზე" ერთად გადასვლა დავაპირეთ. ხიდზე პოლიციამ გაგვაჩერა და სათითაოდ დაკითხვა მოგვიწყო. ზოგმა უთხრა, დაკრძალვაზე მივდივართო, ზოგმა კი სხვა პასუხი გასცა. მიხვდნენ, რომ ვატყუებდით და უკან დაბრუნება მოგვთხოვეს. ერთ-ერთ ქალს ხელითაც შეეხნენ. მისმა შვილმა კი პოლიციას წინააღმდეგობა გაუწია, ამის გამო სასტიკად სცემეს. უკან გამოგვაბრუნეს, ჩვენი ვინაობა ჩაიწერეს და გვითხრეს მოგვიანებით მოგხედავთო".

მსგავსი პრობლემების გამო გალელმა ამომრჩევლებმა, რომლთა საერთო  რაოდენობა დაახლოებით 45-50 000-ია, თვითმმართველობის არჩევნებში მონაწილეობა ვერ შეძლეს. ზუგდიდში გადასვლა და საკუთარი არჩევანის გაკეთება მხოლოდ მცირე ნაწილმა მოახერხა.

დატოვეთ თქვენი კომენტარი

თქვენი სახელი:
თქვენი კომენტარი:

ქართულად
დამცავი კოდი:

    

თქვენი აზრით, პარლამენტის მიერ ცოტა ხნის წინ გათავისუფლებული პოლიტპატიმრები იმსახურებდნენ თუ არა განთავისუფლებას?

უნდა გაეთავისუფლებინათ არ უნდა გაეთავისუფლებინათ მხოლოდ ნაწილი უნდა გაეთავისუფლებინათ მიჭირს პასუხის გაცემა

წინ

არქივი შედეგები