04:17, Sunday, 12.07.2020
YouTube
Twitter
Facebook
RSS
ქართული English

პორტალი ადამიანის უფლებების შესახებ

Go
გაფართოებული ძიება

პედაგოგები პრეზიდენტის დაპირებების შესრულებას ითხოვენ

06.10.2009
თაკო ხუციშვილი

საქართველოს პედაგოგთა და მეცნიერთა პროფკავშირმა მასწავლებელთა მსოფლიო დღე პარლამენტის წინ აქციით აღნიშნა. პროტესტის მიზეზი იმ საკანონმდებლო ინიციატივის უგულებელყოფა იყო, რომელიც 60 000 მდე პედაგოგის ხელმოწერით პარლამენტში  ჯერ კიდევ დეკემბერში შევიდა. „ღირსეული ხელფასი განათლების სისტემის ყველა თანამშრომელს, უვადო ხელშეკრულებები პედაგოგებს,  მასწავლებელთა უკანონო გათავისუფლების შეწყვეტა“ - ეს ის ძირითადი მოთხოვნებია, რომლებსაც პედაგოგები აქციაზე აყენებდნენ. კანონპროექტის მიხედვით პედაგოგები კვალიფიკაციის ამაღლებისთვის საჭირო სახსრების სახელმწიფოსგან გაღებას, სკოლების დეოპტიმიზაციას და სკოლამდელი განათლების დაწესებულებებისათვის საგანმანათლებლო სტატუსის აღდგენას მოითხოვენ.

„აუცილებელია მასწავლებელთა ზოგადი წახალისების სწორი სისტემა შეიქმნას. ვინაიდან თუ საქართველოში არ გაიზარდა განათლებული თაობა, არ იქნება საქართველო, არ გვექნება მომავალი და არ გვექნება პერსპექტივა, არც მსოფლიოში იქნება ჩვენი ადგილი და არც ქართველებს ექნებათ კეთილდღეობა“, - პრეზიდენტმა ეს სიტყვები ჯერ კიდევ გასული წლის 8 მაისს  წყნეთის პედაგოგთა სახლში მასწავლებლებთან შეხვედრის დროს წარმოთქვა. თუმცა მისი იდეები პარლამენტის განათლების მეცნიერების და კულტურის კომიტეტს დღემდე არ გაუზიარებია.

პედაგოგთა და მეცნიერთა თავისუფალი პროფკავშირების პრეზიდენტის მანანა ღურჭუმალიძის განცხადებით პედაგოგთა საკანონმდებლო ინიციატივა სხვა არაფერია, თუ არა პრეზიდენტის დანაპირებებისთვის  საკანონმდებლო სახის  მინიჭება.

„კონსტიტუციის 67-ე მუხლით ჩვენ უფლება გვქონდა პარლამენტში კანონპროექტი შეგვეტანა. ყველა პროცედურული ნორმით გათვალისწინებული ვადა გავიდა, ჩვენი საკანონმდებლო ინიციატივა კი სამწუხაროდ  არავინ განიხილა. 10 დღის წინ ჩვენ დავუკავშირდით განათლების კომიტეტის თავმჯდომარის მოადგილეს ქალბატონ ხათუნა ოჩიაურს. მან გვიპასუხა, რომ მასწავლებლების არცერთი მოთხოვნა არ იქნება დაკმაყოფილებული.  ჩვენი აქციის მიზანია, ხმა მივაწვდინოთ საქართველოს პრეზიდენტს, რათა  რეალურად შესრულდეს მისი დაპირებები“, - განაცხადა აქციაზე მანანა ღურჭუმალიძემ.

პედაგოგთა საპროტესტო აქციას სოლიდრობა პროფკავშირების გაერთიანებამაც გამოუცხადა.

თამარ ლობჯანიძე - ისტორიის მასწავლებელი: „პედაგოგებს ისეთი სერიოზული მოთხოვნები გვაქვს, რომ მხოლოდ ეს პატარა აქცია ვერ უშველის. დღეს მასწავლებელი დაუცველია, როგორც სოციალურად ასევე ეკონომიკური თვალსაზრისით. ხელისუფლებამ უნდა გაიგონოს ჩვენი პროტესტი“.

პედაგოგებს მხარი ქრისტიან-დემოკრატებმაც დაუჭირეს. გიორგი თარგამაძის განცხადებით, საქართველოს მომავალი განათლების სისტემის განვითარებაზეა  დამოკიდებული: „ჩვენ მხარს ვუჭერთ პარლამენტში შემოსულ საკანონმდებლო ინიციატივას „ზოგადი განათლების კანონში ცვლილების შეტანის შესახებ“, რადგან მიგვაჩნია, რომ ეს არის პრიორიტეტული მიმართულება, ვინაიდან საქართველო მხოლოდ იმ შემთხვევაში გადარჩება, თუკი გვეყოლება უფრო მეტი კვალიფიციური და განათლებული ადამიანი“.

ლევან ვეფხვაძემ ბიუროს სხდომაზე საკითხი კანონპროექტის განხილვის შესახებ არაერთხელ დააყენა, მაგრამ მის ინიციატივებს პარლამენტი უარით პასუხობდა, ხოლო მიზეზად განათლების სამინისტროსთან წარმოებულ კონსულტაციებს ასახელებდნენ.

„არსებობს ვადები, და ამ ვადებში კომიტეტს ეს კანონპროექტი უნდა განეხილა, თუმცა ეს პროცესი უცნაურად ჭიანურდებოდა. გოკა გაბაშვილი და ხათუნა ოჩიაური მპასუხობდნენ, რომ ერთიანი პოზიციის ჩამოსაყალიბებლად განათლების სამინისტროსთან კონსულტაციები მიმდინარეობდა. ჩვენ ამ კვირაში ფრაქციის სხდომა გვექნება და თუ კომიტეტს ამის შემდეგაც არ ექნება ნება განიხილოს კანონპროექტი, მაშინ ჩვენი ინიციატივით ეს საკითხი პლენარულ სხდომაზე კომიტეტის დასკვნის გარეშე გავა“, - განაცხადა ლევან ვეფხვაძემ. 

განათლების, მეცნიერების და კულტურის კომიტეტის თავმჯდომარის მოადგილე ხათუნა ოჩიაური კი ფიქრობს, რომ „ზოგადი განათლების კანონში“ ცვლილებების შეტანის აუცილებლობა არ არსებობს, ვინაიდან ის ცვლილებები, რომლებსაც პედაგოგები მოითხოვენ უკვე მოქმედებს. 

მასწავლებელთა მოთხოვნის საპასუხოდ პარლამენტის თავმჯდომარე დავით ბაქრაძემ განათლების კომიტეტს კანონპროექტის განხილვისთვის ორკვირიანი ვადა მისცა.

პედაგოგთა მოთხოვნის შეუსრულებლობის შემთხვევაში მანანა ღურჭუმელაძე არც დემონსტრაციების გამართვასა და შიმშილობის აქციის დაწყებას არ გამორიცხავს.

Print Send to Friend Send to Facebook Tweet This
დატოვეთ თქვენი კომენტარი
თქვენი სახელი:
თქვენი კომენტარი:

ქართულად
დამცავი კოდი: Code
სხვა სიახლეები
გამოკითხვა
ახალი კორონავირუსის გავრცელების გამო დაკარგეთ თუ არა სამსახური?
დიახ არა

ბლოგი

ძალადობის მსხვერპლი ქალები
ასაკის მატებას ერთი უპრატესობა აქვს, მრავალწლიან გამოცდილებასთან ერთად საზოგადოებრივი ცნობიერების ცვლილების უშუალო მონაწილე ხდები. ეს ცვლილებები შემდეგ უკვე საკანონმდებლო ცვლილებებში აისახება. დრო ცვლის
ვრცლად...
ქალ პატიმართა მოლოდინები
სექსუალური უმცირესობები საქართველოს ციხეებში
არქივი
   

       

რედაქტორის აზრი

ხელისუფლებისგან მივიწყებული ვეტერანები
ყოველწლიურად მცირდება მეორე მსოფლიო ომის მონაწილეთა რაოდენობა. მათ შესახებ კი საზოგადოება მხოლოდ 9 მაისს იღებს ინფორმაციას, როდესაც ომის ვეტერანები, ტრადიციულად, გამარჯვების პარკში იკრიბებიან
ვრცლად...
უიმედოთა სოფელი
რა დაემართა სამართლიანობის აღდგენის ოცნებას
არქივი
თემები
კატეგორიები

Copyright © 2004 - 2020 HRIDC