აფხაზი ჟურნალისტები საპროტესტო აქციას გამართავენ
სოხუმი.26.12.04.მედია-ნიუსი. 28 დეკემბერს სოხუმში საინფორმაციო სააგენტო „აფსნიპრესის“ ლიკვიდაციის გამო ადგილობრივ ჟურნალისტთა საპროტესტო აქცია იგეგმება. აქციის ინიციატორებმა შესაბამისი სანქცია სოხუმის მერიისგან უკვე მიიღეს.ჟურნალისტები სააგენტოს დახურვაში პრემიერ-მინისტრს ნოდარ ხაშბას ადანაშაულებენ და როგორც ერთ-ერთი გაზეთის რედაქტორი იზიდა ჭანია აცხადებს, ხაშბას დანიშვნისთანავე ნათელი გახდა, რომ იგი საინფორმაციო საშუალებებს ბრძოლას გამოუცხადებს.„მან სწორედ „აფსნიპრესიდან“ დაიწყო, რადგან იგი სახელმწიფო სააგენტო იყო და ხაშბას, როგორც პრემიერ-მინისტრს, მისი დახურვის უფლება ჰქონდა. ეს ფაქტი კიდევ ერთხელ მიუთითებს, რომ კანონი პიროვნებებზეა მორგებული,“- დასძენს ჭანია.მისივე აზრით, საინფორმაციო სააგენტოს დახურვის გადაწყვეტილება ხაშბამ იმიტომ მიიღო, რომ 3 ოქტომბრის არჩევნების შემდეგ განვითარებულ მოვლენებს იგი ობიექტურად აშუქებდა.ამავე საკითხთან დაკავშირებით, აფხაზეთის ეგრეთ წოდებულ პარლამენტში 27 დეკემბერს მოსმენაც გაიმართება.ცნობისთვის: საინფორმაციო სააგენტო „აფსნიპრესის“ გაუქმების შესახებ ბრძანება ნოდარ ხაშბამ 24 დეკემბერს გამოსცა. სააგენტოს უფლებები გადაეცა ახლად შექმნილ ბეჭდვით სააგენტოს. „აფსნიპრესი“ 1995 წლის 31 იანვრიდან ფუნქციონირებდა.