ოპოზიცია ზუგდიდის სასამართლოს გადაწყვეტილებას უსამართლოს უწოდებს

გაერთიანებული ოპოზიციის წევრები ზუგდიდის სასამართლოს მიერ გამოტანილ განაჩენს შეურაცხმყოფელსა და უსამართლოს უწოდებენ. იმ პირებს, რომლებმაც ოპოზიციონერ დეპუტატებს ფიზიკური შეურაცხყოფა მიაყენეს, ზუგდიდის რაიონულმა სასამართლომ 20-დღიანი პატიმრობა და 400-ლარიანი ჯარიმა შეუფარდა.

ოპოზიციის წარმომადგენლების განცხადებით, დეპუტატზე ფიზიკური შეურაცხყოფის მიყენებისთვის სისხლის სამართლის კოდექსი 6-დან 12 წლამდე თავისუფლების აღკვეთას ითვალისწინებს. იმ ფონზე, როდესაც სამართალდამცველები 20 დღით მოქალაქეებს საგზაო წესების დარღვევისთვის აპატიმრებენ, ზუგდიდის სასამართლოს მიერ გამოტანილი აღნიშნული სასჯელი შეუსაბამო და უკანონოა.

28 ოქტომბერს ზუგდიდის ცენტრში ოპოზიციის საპროტესტო აქცია ფიზიკურ დაპირისპირებაში გადაიზარდა. თბილისიდან ჩასულ ოპოზიციის ლიდერებს ადგილობრივი მოსახლეობის ნაწილი დაუპირისპირდა. შეხლა-შემოხლის დროს ფიზიკური შეურაცხყოფა მიაყენეს დეპუტატებს ბეჟან გუნავასა და ბიძინა გუჯაბიძეს.

წყარო: მედიანიუსი