რუსეთი აფხაზეთში საკუთარი მოქალაქეების „საკუთრების უფლების“ დაცვას მოითხოვს

მოსკოვსა და სოხუმს შორის სკანდალი მწიფდება. ამის შესახებ გამოცემა „მოსკოვსკი კომსომოლეცი“ იუწყება.

გაზეთის ინფორმაციით, რუსეთის საგარეო საქმეთა სამინისტრომ სოხუმის რეჟიმს უკვე გაუგზავნა ნოტა, რომელშიც „რუსეთის მოქალაქეების საკუთრების უფლების მრავალრიცხოვანი დარღვევის გამო სერიოზული შეშფოთება“ გამოთქვა.

აფხაზი ადვოკატის, თამაზ ქეცბას განცხადებით, მისთვის უძრავი ქონების ჩამორთმევის ასეულობით ფაქტია ცნობილი. „მხოლოდ მე 30 ამგვარ საქმეს ვაწარმოებ. რუსეთის საელჩოში ციფრი 4000 დამისახელეს, მათგან უძრავი ქონების უკანონოდ ჩამორთმევის შესახებ სწორედ ამდენი განცხადება დევს“, - აღნიშნა ქეცბამ.

როგორც გამოცემა წერს, აფხაზეთში უძრავი ქონების შეძენის უფლება აფხაზური კანონმდებლობით მხოლოდ „აფხაზეთის მოქალაქეს“ აქვს, რუსეთის მოქალაქეები კი, უძრავი ქონების შესაძენად იძულებულნი არიან, სხვადასხვა საეჭვო სქემებში მიიღონ მონაწილეობა.

„აქ რუსები ყველაზე დაუცველ მდგომარეობაში აღმოჩნდნენ. აფხაზს ადვილად ვერ გაანაწყენებ, საცხოვრებელს ვერ წაართმევ, რადგან მის უკან მრავალრიცხოვანი ნათესაობა დგას. რუსებს კი აქ არავინ იცავს“, - განაცხადა ადვოკატმა ქეცბამ.

„ინტერპრესნიუსი“