საქართველოს გარემოს დაცვისა და ბუნებრივი რესურსების მინისტრმა გოგა ხაჩიძემ სამინისტროს გარემოს ინტეგრირებული მართვის დეპარტამენტის ნარჩენებისა და ქიმიურ ნივთიერებათა მართვის სამმართველოს უფროსი ალვერდ ჩანქსელიანი და ამავე სამმართველოს სპეციალისტი ხათუნა ახალაია თანამდებობიდან გაათავისუფლა.
ამის შესახებ კახეთის საინფორმაციო ცენტრი იუწყება. მათივე ინფორმაციით, ჩანქსელიანმა და ახალაიამ 2010 წლის 29 ივლისს კახეთის საინფორმაციო ცენტრის საგამოძიებო ჯგუფის ჟურნალისტებს სიტყვიერი და ფიზიკური შეურაცხყოფა მიაყენეს. ინციდენტი სამინისტროს შენობაში, ორჰუსის ცენტრში მოხდა.
ჟურნალისტები სამინისტროს პრესცენტრთან შეთანხმების შემდეგ, ჩანქსელიანისა და ახალაიასგან, ერთ-ერთ პროექტთან დაკავშირებით კითხვებზე პასუხის გაცემას ითხოვდნენ, რამაც ჩინოვნიკების გაღიზიანება გამოიწვია.
კახეთის საინფორმაციო ცენტრის მიერ ჩატარებული ჟურნალისტური გამოძიების შედეგად გაირკვა, რომ ჰოლანდიის მთავრობის მიერ დაფინანსებული პროექტი, რომლის მიზანიც კახეთში ვადაგასული პესტიციდების რისკ - ფაქტორების შემცირება იყო, ქართულმა მხარემ ფაქტობრივად ჩააგდო. ჟურნალისტური გამოძიება ევრაზიის თანამშრომლობის ფონდის მხარდაჭერით განხორციელდა.
ინტერპრესნიუსი