სიღნაღის გამგეობამ უსახლკარო ოჯახი თავშესაფრით უზრუნველყო

სიღნაღის მუნიციპალიტეტის გამგეობამ, კახეთის საინფორმაციო ცენტრის მიერ, სოფელ ვაქირიდან მომზადებულ ფოტორეპორტაჟზე რეაგირება მოახდინა. ადგილობრივმა ხელისუფლებამ ქემაშვილების უსახლკაროდ დარჩენილი ოჯახი თავშესაფრით უზრუნველყო.

გამგეობამ ქემაშვილების ოთხსულიანი ოჯახი ვაქირის ყოფილი ამბულატორიის შენობის რამდენიმე ოთახში შეასახლა. შესახლებამდე გამგეობის ხარჯებით შენობის სახურავიც შეკეთდა. „ღუმელი, საწოლები და საბანიც მოგვცეს. ზოგმა პროდუქტი მოგვიტანა და ეხლა ცოტა ნორმალურად ვცხოვრობთ. სანამ უსახლკაროდ ვიყავით და ქუჩაში გვეძინა, 2 თვის ბავშვი მომიკვდა. ეხლა მისი ტანსაცმელები დავრეცხე, უნდა შევინახო“, - გვითხრა ნინო ქემაშვილმა.

ქემაშვილები დღიურ სამუშაოზე დადიან და თავს ამით ირჩენენ.

შეგახსენებთ, რომ სიღნაღის რაიონის სოფელ ვაქირში ქემაშვილების 4 სულიანი ოჯახი ღია ცის ქვეშ ცხოვრობდა. სტიქიის შედეგად ოჯახს საცხოვრებელი სახლი 6 წლის წინ დაენგრა. მას შემდეგ მათ ერთ-ერთი საცხოვრებელი სახლის გალავანთან ეძინათ. ქემაშვილების მთელი ქონება რამდენიმე ქვეშაგი და ავტომობილის სკამი იყო, რომელიც საწოლის მაგივრობას ასრულებდა. ქემაშვილების ოჯახის ყველა წევრი შეზღუდული შესაძლებლობის მქონეა. ორი მათგანი გადაუდებელ მკურნალობას საჭიროებს.