პორტალი ადამიანის უფლებების შესახებ

საინფორმაციო სააგენტო „ინფო 9“-მ გაავრცელა ვიდეომასალა, რომელიც ასახავს სააგენტოს ზესტაფონის კორესპონდენტზე ზეწოლისა და პროფესიულ საქმიანობაში ხელის შეშლის ფაქტებს.

სააგენტოს ინფორმაციით, ჟურნალისტ ეკატერინე დუგლაძეს ერთი კვირაა დასდევს ადამიანთა ჯგუფი, რომელიც თავს „მედია ჯგუფს“ უწოდებს. „7 მამაკაცი, მათ შორის ხუთი კამერით ხელში, მუდმივად დაჰყვება მას და უსვამს არაკორექტულ და პროვოკაციულ შეკითხვებს. ეკატერინე დუგლაძეს უმძიმესი ფსიქოლოგიური ზეწოლის პირობებში უწევს მუშაობა“, – ნათქვამია „ინფო 9“–ის მიერ გავრცელებულ განცხადებაში.

რეგიონული საინფორმაციო ცენტრები მივმართავთ საქართველოს მთავარ პროკურატურას, დაუყოვნებლივ დაიწყოს მომხდარზე გამოძიება. ამასთან, მოვუწოდებთ საქართველოს სახალხო დამცველს, უფლებადაცვით არასამთავრობო ორგანიზაციებს, რეაგირება მოახდინონ აღნიშნულ ფაქტებთან დაკავშირებით. მივმართავთ იმერეთის გუბერნატორის ადმინისტრაციას და ზესტაფონის ადგილობრივი თვითმმართველობის ხელმძღვანელობას, მისცენ ჟურნალისტს ადგილობრივი თვითმმართველობის შენობაში დაუბრკოლებლად შესვლის, გადაადგილებისა და მუშაობის უფლება.