შორენა კაკაბაძე, ქუთაისი
„ერთად შევაჩეროთ ქალთა მიმართ ძალადობა“ - ამ მოწოდებით 25 ნოემბერს, ქუთაისში არასამთავრობო ორგანიზაციები და სტუდენტები გაერთიანდნენ. აქციაზე, რომელიც ქალაქის ცენტრში, მესხიშვილის თეატრის წინ გაიმართა, ხელი მოეწერა პეტიციას, რომელიც პრემიერ-მინისტრისა და პარლამენტის თავმჯდომარის სახელზე გაიგზავნება.
„პეტიციაში საუბარია ქალთა მიმართ ძალადობის აღმოფხვრის მექანიზმებზე, იმაზე, რომ ამ მხრივ საქართველოში უმძიმესი ვითარებაა და სახელმწიფომ, შესაბამისმა უწყებებმა, სათანადო შრომა უნდა გაწიონ, რათა მდგომარეობა გაუმჯობესდეს“, - ითქვა აქციაზე, რომელსაც არასამთავრობო ორგანიზაციების წარმომადგენლებისა და სტუდენტების გარდა რიგითი მოქალაქეებიც შეუერთდნენ.
აქციამდე აღნიშნულ თემას მრგვალი მაგიდა მიუძღვნა ახალგაზრდა იურისტთა ასოციაციის ქუთაისის ფილიალმა. რაც შეეხება პეტიციას, ხელმოწერები გრძელდება, რის შემდეგაც იგი ქვეყნის პირველ პირებს გაეგზავნება.