ტრეფიკინგის მსხვერპლი ყირგიზი ქალი სამშობლოში გაამგზავრეს
თბილისი.29.06.05.მედიანიუსი. მაისში საქართველოს სახალხო დამცველს განცხადებით მიმართა ყირგიზეთის მოქალაქე ქალბატონმა, რომელიც მისი განცხადების თანახმად, საქართველოში დასაქმების მიზნით ჩამოვიდა, მაგრამ ტრეფიკინგის მსხვერპლი აღმოჩნდა და ორი წლის განმავლობაში ვინმე დავითის ძალადობის შედეგად პროსტიტუციას ეწეოდა. ქალმა შემთხვევის წყალობით მოახერხა ტყვეობიდან თავის დაღწევა, მაგრამ ფულისა და საბუთების გარეშე სამშობლოში დაბრუნება ვერ მოახერხა. სახალხო დამცველის აპარატის ქალთა უფლებების დაცვის ცენტრის ხელმძღვანელმა ბაია რომელაშვილმა დახმარებისთვის მიმართა ყირგიზეთის ომბუდმენსა და ყირგიზეთის საკონსულოს მოსკოვში და დაზარალებულს დროებითი საბუთების მიღებაში დაეხმარა. უცხოელ ქალბატონს ფინანსური დახმარება საქართველოში მოქმედმა მიგრაციის საერთაშორისო ორგანიზაციამ (IOM) გაუწია. ტრეფიკინგის მსხვერპლი რამდენიმე დღის წინათ ყირგიზეთში დაბრუნდა.