ზუგდიდელი ჯინა კარტოზია შვილის უფლებების დაცვას ითხოვს
ზუგდიდში 24 ნოემბერს 12 წლის მარიამ გვარამიას გატაცების ფაქტთან დაკავშირებით მიმდინარე გამოძიება, ოფიციალური ვერსიით სამხილების არარსებობის გამო შეწყდა. ძიების უკანონო შეწყვეტაში მარიამის დედა, ჯინა კარტოზია კონსტიტუციური უსაფრთხოების დაცვის დეპარტამენტის ზუგდიდის თანამშრომლებსა და სახალხო დამცველის აპარატს, კერძოდ, კი გიორგი ონიანს ადანაშაულებს. "ჩემთვის ცნობილია, რომ სამართალდამცავებმა თვითმხილველებს ჩვენებები შეაცვლევინეს. სასურველი ჩვენების მისაღებად მათ სამი დღის განმავლობაში ზუგდიდელი მამუკა შალამბერიძეც ყავდათ გატაცებული, მეტიც, ჩემს გოგონაზე ზეწოლას ახდენდნენ და ცდილობდნენ ამოცნობისას სხვა მანქანისათვის დაედო ხელი. ფაქტია, ბავშვს ნიღბიანი მძღოლის გარდა სამივე გამტაცებლის ამოცნობა შეუძლია. თვითმხილველებთან გასაუბრების შემდეგ ონიანმა განმიცხადა, რომ მოწმეებზე ზეწოლის ფაქტს ვერ ხედავდა და მხოლოდ ჩემი მოთხოვნის შემდეგ გაესაუბრა ბავშვს. ის გამუდმებით იღებდა ტელეფონით ინსტრუქციებს მისი ხელმძღვანელისგან, ბაჩო ახალაიასგან, რომელიც კონსტიტუციური უსაფრთხოების დაცვის დეპარტამენტის უფროსის, დათა ახალაიას ძმაა და ბუნებრივია ამ საქმის გახმაურება ამიტომაც არ აწყობს",- აცხადებს ჯინა კარტოზია და შვილის უფლებების დასაცავად საერთაშორისო ორგანიზაციების ჩართვასა და ფაქტის ობიექტურ გამოძიებას ითხოვს.
ახალი ამბები
პოპულარული
რატომ ვერ იბრუნებენ კონფლიქტით დაზარალებული ოსები საქართველოს მოქალაქეობას და ქონებას?
სპეციალურ პენიტენციურ სამსახურს წამების მსხვერპლის სასარგებლოდ 50 000 ლარის გადახდა დაეკისრა
'ალბათ, ნებისმიერი რეგიონული ჟურნალისტი გეტყვით, რომ გადარჩენისთვის გვიწევს ბრძოლა!'
