არასრულწლოვანთა ადმინისტრირებაზე სემინარი ჩატარდა
არასამთავრობო ორგანოზაცია „ადამიანის უფლებათა საინფორმაციო და სადოკუმენტაციო ცენტრის“ ინიციატივით სახალხო დამცველის ოფისში ჟურნალისტებისთვის სემინარი ჩატარდა. პროექტი, რომელიც აღნიშნულმა ცენტრმა UNICEF-ის ფინანსური დახმარებით ახორციელებს, არასრულწლოვანთა სამართლის ადმინისტრირების რეფორმის მხარდაჭერას ეხება. ტრენერები იყვნენ „ადამიანის უფლებათა საინფორმაციო ცენტრის“ იურისტი ნინო ტოგონიძე და გიორგი აფრიაშვილი ასევე სახალხო დამცველის აპარატის გამოძიებისა და მონიტორინგის დეპარტამენტის უფროსი გიგა გიორგაძე.
რაც შეეხება სემინარზე განხილულ თემებს, ეს იყო: იუვენალური იუსტიციის ცნება; იუვენალური იუსტიციის მოდელები საზღვარგარეთის ქვეყნებში; საერთაშორისო აქტები, რომლებიც არასრულწლოვანთა მიმართ მართლმსაჯულების განხორციელებას არეგულირებს და საქართველოში არასრულწლოვანთა სასამართლო მოდელი.
როგორც ტრენერმა ნინო ტოგონიძემ გვითხრა, აღნიშნული პროექტის ფარგლებში ტრენინგი სხვადასხვა მიზნობრივ ჯგუფებს შორის ტარდება. ეს ჯგუფებია: იურისტები, მოსამართლეები, პროკურორები, არასრულწლოვანთა აღმზრდელობითი დაწესებულების ადმინისტრაცია, ბავშვთა სოციალური ადაპტაციის ცენტრის ადმინისტრაცია და არასრულწლოვანთა აღმზრდელობითი დაწესებულების პატიმრები.
პროექტის ფარგლებში ბავშვთა სოციალური ადაპტაციის ცენტრში იურიდიული და ფსიქოლოგიური დახმარების ცენტრიც გაიხსნა, სადაც „ადამიანის უფლებათა საინფორმაციო და სადოკუმენტაციო ცენტრის“ ფსიქოლოგი და იურისტი მუშაობს. ასევე, პროექტის ფარგლებში იუსტიციის სამინისტროს არასრულწლოვანთა დაწესებულებაში პატიმრებს ინგლისურსა და კომპიუტერს ასწავლიან.
ახალი ამბები
პოპულარული
რატომ ვერ იბრუნებენ კონფლიქტით დაზარალებული ოსები საქართველოს მოქალაქეობას და ქონებას?
სპეციალურ პენიტენციურ სამსახურს წამების მსხვერპლის სასარგებლოდ 50 000 ლარის გადახდა დაეკისრა
'ალბათ, ნებისმიერი რეგიონული ჟურნალისტი გეტყვით, რომ გადარჩენისთვის გვიწევს ბრძოლა!'
