ქალთა კოლონიაში მცირეწლოვანი ბავშვების დედები 30 იანვრიდან უვადო შიმშილობას იწყებენ. ამის შესახებ „პირველს“ უფლებადამცველმა ნანა კაკაბაძემ განუცხადა.
მისი ინფორმაციით, შიმშილობის აქციას იწყებენ პატიმრები - იზოლდა ქველიძე, თამილა ბართაია, ელენე თუშიშვილი, სედა სოგომონიანი და ია ხვიჩია, რომელთაც მცირეწლოვანი (3 წლამდე) შვილები ჰყავთ, რადგან ციხის ადმინისტრაცია მათთვის ბავშვების ჩამორთმევასა და მიუსაფარ ბავშვთა სახლში გადაყვანას აპირებს.
კაკაბაძის განცხადებით, პატიმარ ქალებს უფლება აქვთ, 3 წლამდე ბავშვები სასჯელაღსრულების სისტემაში თან იყოლიონ, 3 წლის შემდეგ ბავშვების საცხოვრებელის შესახებ გადაწყვეტილებას ადმინისტრაცია იღებს.
მისივე განმარტებით, ზემოაღნიშნულ შემთხვევებში, ძირითადად, ბავშვებს ოჯახები არ გააჩნიათ და მათ მიუსაფართა საცხოვრებელში გადაყვანა ელოდება, რაც მშობლების პროტესტის მიზეზს წარმოადგენს.
საინფორმაციო სააგენტო „პირველი“