რაჭაში, კურორტ შოვში ღვარცოფის მოვარდნის შედეგად დაზარალებულის უფლებამონაცვლის, დავით მაისურაძის სამართლებრივ ინტერესებს ადამიანის უფლებათა ცენტრი [HRC] იცავს.
მიმდინარე გამოძიების ფარგლებში პროკურატურამ დავით მაისურაძე დაზარალებულის უფლებამონაცვლედ ცნო, მაგრამ უარი უთხრა საქმის მასალების გადაცემაზე.
ადამიანის უფლებათა ცენტრის იურისტები, როგორც დავით მაისურაძის ადვოკატები, ამ ეტაპზე ეცნობიან საქმის მასალებს იმერეთის, რაჭა-ლეჩხუმისა და ქვემო სვანეთის პოლიციის დეპარტამენტის ადმინისტრაციულ შენობაში.
რაჭაში, კურორტ შოვში ღვარცოფის მოვარდნისას დავით მაისურაძის მეუღლე შორენა ბიჭაშვილი-მაისურაძე და შვილები - 24 წლის კოტე და 20 წლის მარიამ მაისურაძე ემსხვერპლნენ.
დღეის მდგომარეობით, შოვში მომხდარი სტიქიის საქმეზე გამოძიება სისხლის სამართლის კოდექსის 116-ე და 240-ე მუხლებით მიმდინარეობს, რაც გულისხმობს სიცოცხლის მოსპობას გაუფრთხილებლობით და სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას.